Weird Jun Worth Choice

PART 2 尋日我見亞媽出完街返嚟拎住支雞毛掃，我話屋企咪已經有囉，又買多支？亞媽冇正面回答我，但我相信唔係為咗打掃而買咁簡單！ 呢幾日我除咗守住張飯枱，我仲將行動升級攞埋個電視搖控，搞到亞媽冇得煲劇，就連細妹都冇得睇卡通片，細妹開始埋怨我，我同佢講，如果開咗個電視，亞媽就乘機唔熄電視煲埋劇㗎喇！ 跟住又到細佬嚟投訴，佢話我霸咗張飯枱搞到佢冇得做功課，冇功課交會畀老師罰，我就話你可以去茶几做住先，我知你要屈起對腳做功課係辛苦，但要抗爭就要犧牲，冇辦法，爭取三餸一湯，有魚有肉，對你地都有好處，食罐頭冇益㗎！但佢地表現出一副食罐頭有乜問題嘅樣，唉，激死！ 到咗傍晚時份，亞媽叫咗細佬入房，唔知傾咗D乜，冇耐細佬就出嚟大力搖我坐緊果張櫈，又扯我頭髮，仲咬咗我手臂一啖，我大叫好痛，我見亞媽喺遠處見到曬整個過程，佢不但冇阻止，仲話我蝦細佬唔畀佢做功課，係我唔啱，搞到老師要見家長就搵著佢嚟煩！我一邊抵抗我細佬嘅攻擊一邊哀號著同亞媽講你睇下細佬咬我個牙印幾深，流血喇，佢先扮下野掹開我細佬！ 跟住最令我心寒嘅事出現咗，我見到細佬喺亞媽房行出嚟，手上面仲拎住筒糖，有冇搞錯，呢個咩世界？打人仲有糖食！喺飯枱抗爭咗幾日嘅我，其實已經筋皮力盡，我自己都有犧牲㗎！冇得返房瞓，坐到腰骨都痛埋，不過最痛都係個心，到底我仲應唔應該守住張飯枱，坦白講我開始有D氣餒，我覺得呢個家變得好恐怖！ 原文-Patrick Ng.

從前我有一個快樂家庭，自小跟隨養母長大，後來法庭將我判返畀親生亞媽，生活就180度轉變。以前要乜有乜，而家親生亞媽睇中我識賺錢就爭我返嚟，淨係識問我攞家用，養埋班大食懶細佬妹。 前晚食飯，亞媽又攞D罐頭出嚟開飯，之前又話畀我揀食乜餸，原來一直係點我，上次嗰罐罐頭已經過期，今次呢罐唔單止過期，仲要凹嘅！然後你話下餐畀我揀，點知你打開個櫃門全部罐頭，咁就係叫畀我揀？! 於是我就坐埋飯枱絕食，亞媽就話細佬妹由細食罐頭食到大都係咁啦，我話佢地未食過好野，梗係覺得冇問題啦，我以前三餸一湯，有魚有肉，點同而家餐餐開罐頭。 過咗一陣，細佬妹食完，而我仲選擇繼續坐喺飯枱抗議，我開始feel到亞媽有D唔高興，嫌我阻住佢洗碗執枱，又驚細佬妹有樣學樣，我見勢色唔對，於是即刻換番件厚嘅長袖衫同長褲，亞媽就話我有心挑釁佢，於是就開我拖，我都知你可能會郁我，我梗係著厚D啦，你估我好似細佬妹咁豬咩。 你開我拖，我知我還手就係不孝，因為你係我亞媽，雖然冇乜感情，所以我咪唔還拖，淨係大聲向隔離屋求救囉，但亞媽就同隔離屋講呢D係我地家事，叫人唔好多事！我明我向隔離屋求救會落你面，但我可以點呢？繼續揀罐頭？今次就話打咗兩野，畀隔離屋見到就即刻收手啫，如果半夜閂埋門我咪好危險！ 其實我喺飯枱唔走絕食，都係阻到你洗碗啫，自問好克制啦，我都冇反枱，唔洗開我拖呀？坐低傾下咪得囉，你又唔想同我傾，成日耍我，一係掉咗枱面罐爛罐頭，真係畀我揀食乜餸，最少都道歉承認唔應該開我拖啦，不過亞媽咁要面，呢個機會都幾微，我諗我都係唯有繼續坐喺飯枱抗議！ 原文-Patrick Ng.